ភ្នំពេញ៖ សម្ដេចតេជោ ហ៊ុន សែន បានលើកឡើងថា គ្រឹះដល់រឹងមាំនៃសន្តិភាពស្ថិរភាពនយោបាយ និងម៉ាក្រូសេដ្ឋកិច្ច ជាលក្ខខណ្ឌចាំបាច់សម្រាប់ការអភិវឌ្ឍ សហគ្រាសធុនតូច និងមធ្យម (SMEs) នៅកម្ពុជា ដែលរដ្ឋាភិបាលកម្ពុជាកំពុងតែបន្តភាពជាដៃគូជាមួយនឹងវិស័យឯកជន ដើម្បីធានាកំណើនសេដ្ឋកិច្ច និងធ្វើឱ្យជីវភាពប្រជាជនកាន់តែល្អប្រសើរឡើង។ នេះបើយោងតាមការចុះផ្សាយរបស់សម្ដេចតេជោ ហ៊ុន សែន កាលពីថ្ងៃទី២០ ខែឧសភា ឆ្នាំ២០២៥។

ក្នុងជំនួបជាមួយប្រតិភូសម្ព័ន្ធសមាគមមូលនិធិសម្តេចតេជោ ដើម្បីអភិវឌ្ឍន៏ SMEs នៅកម្ពុជា ដែលដឹកនាំដោយ ឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគម សម្ដេចតេជោ ហ៊ុន សែន បានលើកឡើងថា រដ្ឋាភិបាលកម្ពុជា តែងតែយកចិត្តទុកដាក់យ៉ាងខ្លាំងក្នុងការអភិវឌ្ឍជ្រោមជ្រែងដល់ SMEs ហើយបន្តដល់រដ្ឋាភិបាលក្នុងអាណត្តិទី៧ នេះក៏បន្តជ្រោមជ្រែងយកចិត្តទុកដាក់នៅក្នុងការលើកស្ទួយដល់ SMEs បន្ថែមទៀតផងដែរ។

ក្នុងឱកាសនោះ ឧកញ៉ា តែ តាំងប៉ បានបញ្ជាក់អំពីសមាគមមូលនិធិសម្ដេចតេជោ បានរួមចំណែកយ៉ាងសកម្ម ក្នុងការចូលរួមរៀបចំនូវពិធីបុណ្យសំខាន់ៗ ដោយបានដាក់តាំងពិព័រណ៍នូវផលិតផលរបស់ SMEs ។ ឧកញ៉ា តែ តាំងប៉ បន្តថា តាមរយៈការបណ្ដុះបណ្ដាលពីសមាគមមូលនិធិសម្ដេចតេជោ ដល់សហគ្រាសខ្នាតតូចនិងមធ្យម អំពីការគ្រប់គ្រងធនធានមនុស្សនិងការគ្រប់គ្រងអាជីវកម្ម ជាពិសេសគឺការបណ្ដុះបណ្ដាល ក្នុងការធ្វើឱ្យ SMEs អាចមានលទ្ធភាពទទួលបានកម្ចី នៅក្នុងការអភិវឌ្ឍបន្ថែមនៅសហគ្រាសក៏ដូចជាអាជីវកម្មរបស់ខ្លួន។

សម្ដេចតេជោ ហ៊ុន សែន បានថ្លែងថា តាមរយៈការរៀបចំទិវាជាតិធុនតូច និងមធ្យម ដែលបានធ្វើកន្លងមក គឺជាផ្នែកមួយបានជួយលើកកម្ពស់ SMEs នៅកម្ពុជា និងអរគុណចំពោះសមាគមមូលនិធិសម្ដេចតេជោដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា ដែលបានចូលរួមចំណែកក្នុងការអភិវឌ្ឍវិស័យសេដ្ឋកិច្ចកម្ពុជាជាពិសេសការលើកកម្ពស់សេដ្ឋកិច្ចកម្ពុជា ពិសេសសម្តេច ហ៊ុន សែន បានរំពឹងថាសមាគមមូលនិធិសម្ដេចតេជោ នឹងចូលរួមចំណែកបន្ថែមទៀត សម្រាប់អភិវឌ្ឍន៍សេដ្ឋកិច្ចនៅក្នុងប្រទេសនាពេលខាងមុខ៕