ភ្នំពេញ៖ ប្រធានមន្ទីរកសិកម្មខេត្តប៉ៃលិន កំពុងតែកៀរគរកសិករឱ្យរួមគ្នាបង្កើតសហគមន៍កសិកម្មទំនើបក្នុងពេលឆាប់ៗខាងមុខ ដើម្បីឱ្យតម្លៃទីផ្សារដំណាំឧស្សាហកម្មនៅខេត្តប៉ៃលិន កាន់តែមានភាពល្អប្រសើរឡើង។ នេះបើតាមការលើកឡើងរបស់ឯកឧត្តម ឈុំ ឆុនលី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២០ ខែឧសភា ឆ្នាំ២០២៥។

តាមការចុះផ្សាយរបស់ក្រសួងកសិកម្ម បានឱ្យដឹងថា ខេត្តប៉ៃលិនមានផ្ទៃដីសរុបចំនួន ១១៩៤,៦១ គីឡូម៉ែត្រការ៉េ ដែលផ្ទៃដីកសិកម្មមាន ៤៥ ៨០០ហិកតា ផ្ទៃដីអនុវត្តដាំបានមាន ៨០ ០០០ ហិកតា ដែលក្នុងនោះ ដំណាំស្វាយចន្ទីមានចំនួន ២ ២០០ហិកតា ហើយទទួលបានផល ១,៥ តោន/១ហិកតា។

ជាមួយគ្នានោះ ផ្ទៃដីដាំដំឡូងមីមានចំនួន ៤ ៤០០ហិកតា ទទួលបរិមាណផលប្រហែល ១ លានតោន ចំណែកមៀនប៉ៃលិនវិញ មានផ្ទៃដី ៤ ៩០០ហិកតា ដែលអាចទទួលបរិមាណផលបាន ៣ ៥១០តោន។ គួរបញ្ជាក់ថា ឯកឧត្តម ឈុំ ឆុនលី ដឹកនាំក្រុមការងារក្រោមឱវាទមន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិន គឺដើម្បីចុះពិនិត្យ និងវាយតម្លៃផលិតកម្មដំណាំឧស្សាហកម្មនៅក្នុងខេត្ត៕