ភ្នំពេញ៖ ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា លើកទឹកចិត្តដល់ British Expertise International (BEI) មកវិនិយោគក្នុងវិស័យអប់រំនៅកម្ពុជា លើផ្នែកសំខាន់ៗរួមមានការអភិវឌ្ឍលើការអប់រំឌីជីថលជាដើម ដើម្បីឆ្លើយតបទៅនឹងជំនាញសម្រាប់សតវត្សរ៍ទី២១។

ឯកឧត្តមបណ្ឌិត អ៊ុម រម្យណី បានលើកឡើងពីទិដ្ឋភាពទូទៅ វឌ្ឍនភាព ការអភិវឌ្ឍ និងកាលានុវត្តភាពនៃវិនិយោគក្នុងវិស័យអប់រំរបស់ប្រទេសកម្ពុជា ព្រមទាំងពិភាក្សាពាក់ព័ន្ធនឹងការបន្តកិច្ចសហការទ្វេភាគីរវាងកម្ពុជា-អង់គ្លេស ក្នុងជំនួបជាមួយ BEI កាលពីថ្ងៃទី១៩ ខែឧសភា ឆ្នាំ២០២៥។ ការសិក្សាលើលទ្ធភាពនៃការបង្កើតកិច្ចសហប្រតិបត្ដិការ ក្នុងក្របខ័ណ្ឌអប់រំ និងបណ្ដុះបណ្ដាលធនធានមនុស្ស រវាងភាគីទាំងពីរ ក៏ត្រូវបានលើកឡើងផងដែរ។

ក្នុងកិច្ចជជែក ដែលមានការចូលរួមពីថ្នាក់ដឹកនាំនៃ BEI និងដៃគូជំនាញលើការវិនិយោគក្នុងវិស័យអប់រំជាច្រើន ឯកឧត្តមបណ្ឌិតរដ្ឋលេខាធិការក្រសួងអប់រំ ក៏បានលើកឡើងពីការងារអាទិភាពមួយចំនួនរបស់ក្រសួងអប់រំ ដូចជាការលើកកម្ពស់គុណភាព ការធានានូវលទ្ធភាពទទួលការអប់រំប្រកបដោយសមធម៌ ការពង្រឹងការអប់រំ និងការបណ្តុះបណ្តាលវិជ្ជាជីវៈ ព្រមទាំងការពង្រឹងការអប់រំឌីជីថលមុខវិជ្ជា STEM ជាដើម។ នេះបើតាមការចុះផ្សាយរបស់ក្រសួងអប់រំ នាថ្ងៃទី២០ ខែឧសភា ឆ្នាំ២០២៥៕