ភ្នំពេញ៖ មន្ត្រីពន្ធដារ សហការនឹងអាជ្ញាធរមានសមត្ថកិច្ចថ្នាក់ក្រោមជាតិ ចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូនប្រចាំឆ្នាំ២០២៣ នៅតាមគោលដៅមួយចំនួនលើកំណាត់ផ្លូវសំខាន់ៗ ក្នុងរាជធានី-ខេត្ត ចាប់ពីថ្ងៃទី១៥ ខែមករា ដល់ថ្ងៃទី៣១ ខែមីនា ឆ្នាំ២០២៤។

តាមរយៈសេចក្ដីជូនដំណឹងនាថ្ងៃទី១៨ ខែធ្នូ ឆ្នាំ២០២៣ អគ្គនាយកដ្ឋានពន្ធដារ បានណែនាំម្ចាស់យានយន្ត ដែលខកខានប្រកាសបង់ពន្ធលើមធ្យោបាយដឹកជញ្ជូនប្រចាំឆ្នាំ២០២៣ រួសរាន់ទៅបង់ពន្ធ និងបង់ពន្ធបន្ថែមចំពោះការយឺតយ៉ាវតាមច្បាប់ជាធរមាន។ ការណែនាំរបស់ពន្ធដារនេះ ដើម្បីចៀសវាងនូវក្រុមការងារចម្រុះ និងអាជ្ញាធរមានសមត្ថកិច្ច ឃាត់យានយន្តតាមដងផ្លូវ តម្រូវឱ្យបង់ប្រាក់ពន្ធ ដែលនាំឱ្យខាតពេលវេលា និងកកស្ទះចរាចរណ៍ធ្វើដំណើរ។

សម្រាប់យានយន្ត ដែលធ្លាប់បានប្រកាសបង់ពន្ធលើមធ្យោបាយដឹកជញ្ជូនកន្លងមក ប៉ុន្ដែ មិនទាន់បង់ពន្ធក្នុងឆ្នាំ២០២៣ អាចមកបង់ពន្ធនៅអគ្គនាយកដ្ឋានពន្ធដារគ្រប់សាខាពន្ធដារខេត្ត-ខណ្ឌ ឬនៅធនាគារដែលជាដៃគូពន្ធដារ ឬតាមរយៈកម្មវិធីទូរស័ព្ធដៃ«GDT Taxpayer App»៕