ភ្នំពេញ៖ ជប៉ុន ផ្តល់ជំនួយឥតសំណងប្រមាណជិត ១១លានដុល្លារ ដើម្បីគាំទ្រអង្គភាព CMAC លើគម្រោងចំនួន២ និងគម្រោងសម្រាប់គាំទ្រក្រសួង២ ផ្សេងទៀត ដែលសរុបមាន ៤គម្រោង។ កិច្ចព្រមព្រៀងនេះ ត្រូវបានធ្វើឡើងរវាង ឯកឧត្តមរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងឯកឧត្តម SANUI Kazumasa ប្រធានទីភ្នាក់ងារសហប្រតិបត្តិការអន្តរជាតិជប៉ុន ប្រចាំនៅកម្ពុជា។

ការចុះផ្សាយរបស់មជ្ឈមណ្ឌលសម្មភាពកំចាត់មីនកម្ពុជា នាថ្ងៃទី៣១ ខែមីនា ឆ្នាំ២០២៥ បានឱ្យដឹងថា ជំនួយឥតសំណង ដែលនឹងត្រូវគាំទ្រលើគម្រោងទាំង២ រួមមានគម្រោងទី១ គឺសម្រាប់ពង្រឹងសមត្ថភាពអង្គភាព CMAC លើកិច្ចសហប្រតិបត្តិការត្បូង-ត្បូងក្រោមគម្រោងកម្មវិធីអភិវឌ្ឍន៍សេដ្ឋកិច្ច និងសង្គម។ គម្រោងនេះ មានថវិកាសរុបជាង ៨,៤លានដុល្លារ ដែលត្រូវប្រើប្រាស់ដើម្បីទិញសម្ភារបច្ចេកទេស ដូចជាគ្រឿងចក្រកម្ទេចមីន ម៉ាស៊ីនរាវមីន និងរថយន្ត ដើម្បីលើកកម្ពស់សម្ភារបច្ចេកទេស នៃកិច្ចសហប្រតិបត្តិការផង និងសម្រាប់បម្រើកិច្ចការហ្វឹកហ្វឺនអ្នកជំនាញសកម្មភាពមីនទាំងក្នុងតំបន់ និងអន្តរជាតិផង។

ចំពោះគម្រាងទី២ គឺសម្រាប់គាំទ្របន្ថែមហិរញ្ញប្បទានឥតសំណង ប្រមាណជាង ២លានដុល្លារ សម្រាប់គាំទ្រគម្រោងសាងសង់អាគារហ្វឹកហ្វឺន និងអាគារផ្សព្វផ្សាយអប់រំយល់ដឹងពីសង្គ្រាម (សារមន្ទីរតេជោសន្ដិភាព) នៃមជ្ឈមណ្ឌលសកម្មភាពកំចាត់មីនកម្ពុជា។ គួរបញ្ជាក់ថា ហិរញ្ញប្បទានឥតសំណងក្នុងគម្រោងនេះ សរុបកើនដល់ចំនួន ២,៧៥១លានយ៉េន ប្រមាណជិត ២០លានដុល្លារអាម៉េរិក៕