ភ្នំពេញ៖ កម្ពុជា-តួកគីយ៉េ ជំរុញធុរជននៃប្រទេសទាំងពីរ ឱ្យស្វែងរកឱកាសវិនិយោគនិងធ្វើធុរកិច្ចរួមគ្នា ក្នុងគោលបំណងបង្កើនការវិនិយោគរវាងប្រទេសទាំងពីរ តាមរយៈ «វេទិកាធុរកិច្ចកម្ពុជា-តួកគីយ៉េ» ដែលរៀបចំឡើង ដើម្បីចែករំលែកព័ត៌មានអំពីសក្តានុពលនៃពាណិជ្ជកម្ម និងការវិនិយោគរបស់កម្ពុជា-តួកគីយ៉េ។

ក្នុងវេទិកាធុរកិច្ចកម្ពុជា-តួកគីយ៉េ ដែលសហការរៀបចំដោយសភាពាណិជ្ជកម្មកម្ពុជា សភាពាណិជ្ជឧស្សាហកម្ម និងគណៈកម្មាធិការទំនាក់ទំនងសេដ្ឋកិច្ចបរទេសតួកគីយ៉េ (DEiK) កាលពីថ្ងៃទី១២ ខែធ្នូ ឆ្នាំ២០២៤ សភាពាណិជ្ជកម្មកម្ពុជា និងសភាឧស្សាហកម្មអង់ការ៉ា ក៏បានចុះនូវអនុស្សរណៈនៃការយោគយល់គ្នា ដើម្បីពង្រឹងនូវកិច្ចសហប្រតិបត្តិការរវាងស្ថាប័នទាំងពីរ ក្នុងការជំរុញពាណិជ្ជកម្មនិងការវិនិយោគ។ ក្នុងវេទិកានេះ ក៏មានការចូលរួមរបស់ ឧកញ៉ា គួច ផេង អនុប្រធានសភាពាណិជ្ជកម្មកម្ពុជា ព្រមទាំងតំណាងក្រុមហ៊ុនតួកគីយ៉េចំនួន១៨ និងក្រុមហ៊ុនកម្ពុជាចំនួន៦ ផងដែរ។

នាឱកាសនោះ គណៈប្រតិភូសភាពាណិជ្ជកម្មកម្ពុជា និងលោកអនុព័ន្ធពាណិជ្ជកម្ម បានធ្វើទស្សនកិច្ចទៅកាន់តំបន់ឧស្សាហកម្មទី១ ទីក្រុងអង់ការ៉ា ដើម្បីសិក្សាស្វែងយល់អំពីដំណើរការរោងចក្រចំនួន៤ រួមមាន៖ រោងចក្រផលិតគ្រឿងសង្ហារឹម រោងចក្រតំឡើង Excavator រោងចក្រផលិតចំណីអាហារបង្កក និងមជ្ឈមណ្ឌលគំរូសម្រាប់បណ្តុះបណ្តាលធនធានមនុស្ស៕