ភ្នំពេញ៖ ក្រុមហ៊ុន China Civil Engineering Construction Corporation (CCECC) មានគោលបំណងចូលរួមវិនិយោគ និងអភិវឌ្ឍន៍ហេដ្ឋារចនាសម្ព័ន្ធដឹកជញ្ជូនក្នុងប្រទេសកម្ពុជា។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី១០ ខែធ្នូ ឆ្នាំ២០២៤។

ក្នុងជំនួបពិភាក្សាការងាររវាងប្រតិភូក្រុមហ៊ុន CCECC លោក Sun Xiangchun និងឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ភាគីទាំងពីរ បានពិភាក្សាផ្លាស់ប្ដូរយោបល់ពីស្ថានភាពវិនិយោគរបស់ក្រុមហ៊ុននៅកម្ពុជា ពិសេសលើវិស័យហេដ្ឋារចនាសម្ព័ន្ធ។ លោក Sun Xiangchun បានបង្ហាញពីគម្រោងមួយចំនួន ដែលក្រុមហ៊ុនធ្លាប់បានអភិវឌ្ឍន៍នៅប្រទេសមួយចំនួនដល់ ឯកឧត្តម ស៊ុន ចាន់ថុល ផងដែរ។

ក្នុងកិច្ចពិភាក្សា កាលពីថ្ងៃទី៩ ខែធ្នូ ឆ្នាំ២០២៤ ឯកឧត្តមឧបនាយករដ្ឋមន្ត្រី ស៊ុន ចាន់ថុល ក៏បានលើកឡើងអំពីស្ថានភាពវិនិយោគ និងភាពអំណោយផល ព្រមទាំងការយកចិត្តទុកដាក់របស់រាជរដ្ឋាភិបាលកម្ពុជា លើការវិនិយោគឯកជនផងដែរ៕