ភ្នំពេញ៖ ឯកឧត្តមអភិសន្តិបណ្ឌិត ស សុខា និងលោកជំទាវ កែ សួនសុភី ផ្តល់អាហារូបករណ៍ចំនួន ៤០០កន្លែង នៅវិទ្យាស្ថានខ្មែរជំនាន់ថ្មី លើថ្នាក់បរិញ្ញាបត្ររង-ថ្នាក់បរិញ្ញាបត្រចំនួន ៣០០កន្លែង និងថ្នាក់បរិញ្ញាបត្រជាន់ខ្ពស់ ចំនួន ១០០កន្លែង ដល់សិស្ស-និស្សិត ក្នុងឆ្នាំសិក្សា២០២៤-២០២៥។

ចំពោះលក្ខខណ្ឌសម្រាប់សិស្ស-និស្សិត ដាក់ពាក្យស្នើសុំអាហារូបករណ៍ រួមមាន៖ សិស្ស-និស្សិតទូទាំងប្រទេស, សិស្ស-និស្សិតមកពីខេត្តព្រៃវែង បាត់ដំបង និងខេត្តបន្ទាយមានជ័យ (ទទួលបានអាទិភាព), ធ្លាប់បានចូលរួមសកម្មភាពការងារសង្គម ឬមានជីវភាពខ្វះខាត (ទទួលបានអាទិភាព និងត្រូវភ្ជាប់ជាមួយលិខិតបញ្ជាក់ថាបានចូលរួមសកម្មភាពការងារសង្គម ឬលិខិតបញ្ជាក់ភាពក្រីក្រ ចេញដោយអាជ្ញាធរមានសមត្ថកិច្ច, សិស្ស-និស្សិតត្រូវបំពេញពាក្យស្នើសុំប្រវត្តិរូបសង្ខេប សលាកប័ត្រឯកត្តជន និងសិស្ស-និស្សិត ត្រូវបំពេញកិច្ចសន្យាខិតខំរៀនសូត្រ និងគោរពតាមវិធានបទបញ្ជាផ្ទៃក្នុងរបស់ក្រុមការងារ។

សម្រាប់មុខជំនាញ ដែលសិស្ស-និស្សិត នឹងទទួលបានអាហារូបករណ៍សិក្សានៅវិទ្យាស្ថានខ្មែរជំនាន់ថ្មី រួមមាន៖ កម្រិតថ្នាក់បរិញ្ញាបត្រជាន់ខ្ពស់ លើ ២មុខជំនាញ គឺវិទ្យាសាស្ត្រអប់រំ និងរដ្ឋបាលសាធារណៈ។ សម្រាប់ថ្នាក់បរិញ្ញាបត្ររង-ថ្នាក់បរិញ្ញាបត្រ មាន១២មុខជំនាញ ដូចជាអក្សរសាស្ត្រអង់គ្លេស នីតិសាស្ត្រ រដ្ឋបាលសាធារណៈ វិទ្យាសាស្ត្រកុំព្យូទ័រ គ្រប់គ្រង គណនេយ្យ ទីផ្សារ ធនាគារ និងហិរញ្ញវត្ថុ ទេសចរណ៍ និងសេដ្ឋកិច្ច។

ចំណែក កាលបរិច្ឆេទចូលរៀនលើកទី១ នៅថ្ងៃទី៤ ខែមករា ឆ្នាំ២០២៥ និងលើកទី២ ថ្ងៃទី១ ខែមីនា ឆ្នាំ២០២៥ ក្នុងនោះថ្នាក់បរិញ្ញាបត្ររង-ថ្នាក់បរិញ្ញាបត្រមាន មាន ៣វេន៖ ចន្ទ-សុក្រ (វេនព្រឹក និងវេនល្ងាច) និងសៅរ៍-អាទិត្យ។ សម្រាប់ថ្នាក់បរិញ្ញាបត្រជាន់ខ្ពស់ មានវេន សៅរ៍-អាទិត្យ សិក្សាពេលព្រឹក-ល្ងាច។ ថ្នាក់បរិញ្ញាបត្ររង-ថ្នាក់បរិញ្ញាបត្រ ត្រូវបង់ថ្លៃរដ្ឋបាល ៥០ដុល្លារ/ឆ្នាំ ថ្នាក់បរិញ្ញាបត្រជាន់ខ្ពស់ ២០០ដុល្លារ/ឆ្នាំ។ ចំពោះ ទីតាំងគ្រឹះស្ថានឧត្តមសិក្សា គឺនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ និងសិស្សានុសិស្ស អាចទំនាក់ទំនងតាមលេខទូរសព្ទគ្រឹះស្ថានឧត្តមសិក្សា ០៨៩ ៩៨៩ ៧៧៤, ០៧០ ៦៦៩ ៨៣១។

សិស្ស-និស្សិត ដែលមានចំណាប់អារម្មណ៍ អាចដាក់ពាក្យស្នើសុំអាហារូបករណ៍តាម ៣របៀប៖ ទី១. ដាក់ពាក្យផ្ទាល់នៅទីស្នាក់ការអាហារូបករណ៍អភិសន្តិបណ្ឌិត ស សុខា ដែលមានអាសយដ្ឋាន ផ្ទះលេខ៤៤ ផ្លូវលេខ៤៣២ សង្កាត់ទួលទំពូងទី១ ខណ្ឌចំការមន រាជធានីភ្នំពេញ (បណ្ណាគារកម្ពុជា)។ ទី២. តាមរយៈ Google Form អាហារូបករណ៍អភិសន្តិបណ្ឌិត ស សុខា ដោយបំពេញពាក្យស្នើសុំ និងភ្ជាប់ជាមួយនឹងឯកសារតម្រូវ Scan ឬថត (ឱ្យបានច្បាស់) តាម QR Code ខាងក្រោម។ ទី៣. តាមរយៈ Telegram របស់ក្រុមការងារអាហារូបករណ៍អភិសន្តិបណ្ឌិត ស សុខា ដោយបំពេញពាក្យស្នើសុំ និងភ្ជាប់ជាមួយនឹងឯកសារតម្រូវ Scan ឬថត (ឱ្យបានច្បាស់) ផ្ញើមក Telegram របស់ក្រុមការងារតាមរយៈ៖ ០៩៦ ៥៤៩ ០៧៣៣, ០១៧ ៦៨៤ ៨៨១ និង ០៩៦ ៥៩១ ៦៩៤២។ គួរបញ្ជាក់ថា បេក្ខជនអាចដាក់ពាក្យស្នើសុំអាហារូបករណ៍ ចាប់ពីថ្ងៃជូនដំណឹងនេះ រហូតដល់ថ្ងៃទី១ ខែធ្នូ ឆ្នាំ២០២៤៕