ភ្នំពេញ៖ រដ្ឋាភិបាល ទទួលចំណូល ៣៥ ៩៨៧ ៩៦១ដុល្លារ ពីភ្ញៀវអន្តរជាតិចំនួន ៧៧៤ ២០៣នាក់ កើន២៨,៤៨% ដែលបានទិញបណ្ណចូលទស្សនាតំបន់អង្គរ ក្នុងរយៈពេល១០ខែ ឆ្នាំ២០២៤។ បើតាមសេចក្តីប្រកាសព័ត៌មានរបស់គ្រឹះស្ថានអង្គរ នាថ្ងៃទី១ ខែតុលា ឆ្នាំ២០២៤ ចំនួនថវិកានេះ បានកើនឡើង ២៩,០៧% ធៀបនឹងរយៈពេលដូចគ្នា ឆ្នាំ២០២៣។

សេចក្តីប្រកាសព័ត៌មាន បញ្ជាក់ថា ការលក់បណ្ណឱ្យភ្ញៀវទេសចរបរទេសចូលទស្សនាប្រាសាទកោះកែរ រយៈពេល១០ខែនេះ មានចំនួន ១៥ ២៤៥នាក់ ស្មើនឹង ២២៨ ៦៧៥ដុល្លារ។ ចំណែក ការលក់សំបុត្រទូកវិញ គ្រឹះស្ថានអង្គរទទួលបានចំណូល ៦០៨ ២១៦ដុល្លារ ដែលមានទូកសរុបចំនួន២២ ៦៧៨ ក្នុងនោះទូកតូចចំនួន ១៥ ៨៩៨, ទូកកណ្តាលចំនួន៥ ៩៨៧ និងទូកធំចំនួន៧៩៣។

គួរបញ្ជាក់ថា ក្នុងខែតុលា ឆ្នាំ២០២៤ មានភ្ញៀវបរទេសចូលទស្សនារមណីយដ្ឋានអង្គរចំនួន ៧៤ ៣៥៣នាក់ កើនឡើង១៨,០០% ធៀបនឹងខែតុលា ឆ្នាំ២០២៣ និងរកចំណូលបាន ៣ ៤៦៥ ២៣១ដុល្លារ កើនឡើង ១៨,៣៩% ធៀបនឹងខែតុលា ឆ្នាំ២០២៣៕