ភ្នំពេញ៖ ការអភិវឌ្ឍសេដ្ឋកិច្ចមូលដ្ឋាន តាមរយៈការដាំដុះដំណាំ និងចិញ្ចឹមសត្វ គឺជាជម្រើសជីវិតដ៏ចាំបាច់ ខណៈដែលការចូលរួមដាំដើមឈើបន្ថែមក្នុងមូលដ្ឋាន គឺជាការអភិវឌ្ឍសេដ្ឋកិច្ចរបស់ប្រជាពលរដ្ឋ ដែលរស់នៅក្នុងតំបន់ការពារធម្មជាតិ។ នេះជាការលើកឡើងរបស់ឯកឧត្តមរដ្ឋមន្ត្រីបរិស្ថាន ក្នុងជំនួបជាមួយប្រជាសហគមន៍នៅតំបន់ការពារធម្មជាតិព្រៃធំអន្លង់ធំ ក្នុងភូមិសាស្រ្ដនៃឧទ្យានជាតិ ព្រះជ័យវរ្មន-នរោត្តម«ភ្នំគូលែន» ខេត្តសៀមរាប កាលពីទី០៣ ខែវិច្ឆកា ឆ្នាំ២០២៣។

ដើម្បីស្របតាមគោលនយោបាយរបស់រាជរដ្ឋាភិបាល ដែលកំណត់ថា គម្របព្រៃឈើត្រូវតែកើន៦០ភាគរយ នៅឆ្នាំ២០៥០ ក្នុងទិសដៅបង្កើនភាពបៃតង បង្កើនគម្របព្រៃឈើនោះ ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានលើកទឹកចិត្តដល់ប្រជាពលរដ្ឋនៅតាមសហគមន៍តំបន់ការពារធម្មជាតិ ត្រូវចូលរួមជាមួយក្រសួងបរិស្ថាន ក្នុងការដាំដើមឈើក្នុងយុទ្ធនាការ ១០តុលា ដោយផ្ដល់កូនឈើឥតគិតថ្លៃចំនួន១លានដើម ដាំជារៀងរាល់ឆ្នាំ ចាប់ពី២០២៤ តទៅ។

គួរជម្រាបថា កំឡុងពេលទស្សនកិច្ចក្នុងសហគមន៍ ឯកឧត្តមរដ្ឋមន្រ្ដី និងប្រតិភូក្រសួងបរិស្ថាន ក៏បានទស្សនាការដាក់តាំងផលិតផលសហគមន៍ រួមមាន៖ ការចិញ្ចឹមជ្រូកគូលែន ការចិញ្ចឹមឃ្មុំ ការកែច្នៃអនុផលព្រៃឈើ ផលិតផលកសិកម្មប្រកបដោយនិរន្ដរភាព និងការរៀបចំផែនការវិនិយោគទេសចរណ៍ធម្មជាតិ និងហេដ្ឋារចនាសម្ព័ន្ធពាក់ព័ន្ធ រួមទាំងទឹកស្អាត និងអនាម័យ នៅឧទ្យានជាតិ «ភ្នំគូលែន» ផងដែរ៕