ភ្នំពេញ៖ ឯកឧត្តម ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃផ្សារមូលបត្រកម្ពុជា (ផមក) អំពាវនាវឱ្យប្រជាពលរដ្ឋសិក្សា និងវិនិយោគក្នុងវិស័យមូលបត្រ ក្នុងទិសដៅគាំទ្រម្ចាស់អាជីវកម្ម ក្នុងស្រុកឱ្យទទួលបានប្រភពទុនសម្រាប់ពង្រីក និងពង្រឹងសក្តានុពលអាជីវកម្ម ដើម្បីអាចប្រកួតប្រជែងជាមួយអាជីវកម្មនៅប្រទេសជិតខាង។

ក្នុងពិធីចុះអនុស្សរណៈនៃការយោគយល់គ្នា (MOU) រវាងផ្សារមូលបត្រកម្ពុជា និងវិទ្យាស្ថានហិរញ្ញវត្ថុ និង គណនេយ្យ ឯកឧត្តម ហុង សុហួរ បានគាំទ្រលើកិច្ចសហការដែលលើកកម្ពស់ចំណេះដឹងក្នុងវិស័យមូលបត្រដល់សាស្រ្តចារ្យ និងសិស្សនិស្សិតរបស់វិទ្យាស្ថានហិរញ្ញវត្ថុ និងគណនេយ្យ។ លោក ប៊ុន សុន្ទរង្គ នាយកវិទ្យាស្ថានហិរញ្ញវត្ថុ និងគណនេយ្យ សង្ឃឹមថា សិស្សនិស្សិតនឹងទទួលបានការបណ្តុះបណ្តាលពីអ្នកជំនាញក្នុងវិស័យមូលបត្រ ទទួលបានការចែករំលែកព័ត៌មានទៅវិញទៅមក ក៏ដូចជាមានឱកាសចុះសិក្សាស្វែងយល់បន្ថែមអំពីបច្ចេកវិទ្យាថ្មីៗ។

ការចុះ MOU ដែលធ្វើឡើងកាលពីថ្ងៃទី១៣ ខែកញ្ញា ឆ្នាំ២០២៤ មានគោលបំណងលើកកម្ពស់ការយល់ដឹងក្នុងវិស័យមូលបត្រ ដោយមានការចែករំលែកបទពិសោធទៅវិញទៅមក, ការសហការរៀបចំសិក្ខាសាលាផ្សេងៗ ផ្តល់ឱកាសដល់និស្សិតចុះកម្មសិក្សា និងឱកាសការងារផ្សេងៗ។ នេះបើតាមព្រឹត្តិបត្រព័ត៌មានប្រចាំខែកញ្ញា ឆ្នាំ២០២៤ ដែលផ្សារមូលបត្រកម្ពុជា បានចេញផ្សាយនាថ្ងៃទី១៦ ខែតុលា ឆ្នាំ២០២៤៕