ភ្នំពេញ៖ ក្រុមហ៊ុន Gulfstream Aerospace Corporation ដែលផ្គត់ផ្គត់យន្តហោះឈានមុខមួយរបស់សហរដ្ឋអាម៉េរិក ផ្តោតលើយន្តហោះឯកជន បានបង្ហាញបំណងរួមចំណែកអភិវឌ្ឍន៍ឧស្សាហកម្មអាកាសចរណ៍នៅកម្ពុជា ដើម្បីពង្រីកការតភ្ជាប់ និងទេសចរណ៍ក្នុងតំបន់ និងពិភពលោក។ នេះជាការលើកឡើងរបស់លោក Julien Nargeot អនុប្រធានផ្នែកលក់របស់ក្រុមហ៊ុន Gulfstream Aerospace Corporation។

ក្នុងជំនួបជាមួយសម្តេចធិបតី ហ៊ុន ម៉ាណែត នាថ្ងៃទី១៦ ខែតុលា ឆ្នាំ២០២៤ លោក Julien Nargeot បានបញ្ជាក់ថា ការចាប់អារម្មណ៍ចំពោះឧស្សាហកម្មអាកាសចរណ៍នៅកម្ពុជានេះ គឺដោយសារកម្ពុជាមានការអភិវឌ្ឍរីកចម្រើនយ៉ាងឆាប់រហ័សលើគ្រប់វិស័យ។ ជាមួយគ្នានេះ សម្តេចធិបតី ហ៊ុន ម៉ាណែត ក៏បានលើកឡើងអំពីកំណើនសេដ្ឋកិច្ចប្រកបដោយភាពធន់របស់កម្ពុជា ក៏ដូចជាសន្ទុះនៃការអភិវឌ្ឍលើគ្រប់វិស័យ ការធ្វើធុរកិច្ចក្នុងឧស្សាហកម្មអាកាសចរណ៍នៅកម្ពុជា ដែលនឹងផ្តល់ឱកាសដ៏ល្អដល់ក្រុមហ៊ុនផងដែរ។

បន្ថែមលើនេះ សម្ដេចធិបតីនាយករដ្ឋមន្ត្រី ក៏បានលើកទឹកចិត្តឱ្យក្រុមហ៊ុនបន្តពិភាក្សាជាមួយក្រសួង ស្ថាប័ន និងដៃគូពាក់ព័ន្ធនានា ដើម្បីស្វែងយល់លម្អិតបន្ថែមទៀតអំពី សក្តានុពលនៃការវិនិយោគនៅក្នុងឧស្សាហកម្មអាកាសចរណ៍នៅកម្ពុជាផងដែរ៕