ភ្នំពេញ៖ ទឹកជ្រោះប៊ូស្រា គឺជារមណីយដ្ឋានទឹកជ្រោះ ឬទឹកធ្លាក់បែបធម្មជាតិដ៏ទាក់ទាញ និងត្រូវបានចាត់ទុកជាបេះដូងនៃខេត្តមណ្ឌលគិរី។ ទឹកជ្រោះនេះ មានទេសភាពដ៏ស្រស់ត្រកាល និងមានការរៀបចំលម្អ ដែលផ្តល់ភាពងាយស្រួលដល់ភ្ញៀវទេសចរជាតិ និងអន្តរជាតិ និងបានទាក់ទាញអ្នកទេសចរបានយ៉ាងច្រើនផងដែរ។

ក្រសួងទេសចរណ៍ បានឱ្យដឹងថា ទឹកជ្រោះប៊ូស្រា ត្រូវបានចែកចេញជា ៣ដំណាក់កាល ដោយទី១ ហូរធ្លាក់ក្នុងកម្ពស់៨-១២ម៉ែត្រ ទទឹង១៥ម៉ែត្រនារដូវវស្សា និងកម្ពស់ពី១០-១៥ម៉ែត្រ នៅរដូវប្រាំង។ ចំពោះដំណាក់ទី២ ទឹកនឹងហូរធ្លាក់ពីកម្ពស់១៥-២០ម៉ែត្រ និងមានទទឹង ២០ម៉ែត្រនៅរដូវវស្សា និងកម្ពស់ពី១៨ ទៅ ២៥ម៉ែត្រ នៅរដូវប្រាំង។

ចំណែក ដំណាក់ទី៣ គឺហូរធ្លាក់ដោយល្បឿនលឿនខ្លាំងជាងដំណាក់ទី២ ហើយល្បាក់នេះ មិនមានមនុស្សទៅដល់នោះទេ ពីព្រោះជាតំបន់ព្រៃក្រាស់ និងតំបន់សម្បូរសត្វព្រៃ។ គួរបញ្ជាក់ថា ទឹកជ្រោះនេះ ស្ថិតនៅក្នុងឃុំប៊ូស្រា ស្រុកពេជ្រាដា ខេត្តមណ្ឌលគីរី និងមានចម្ងាយ ៣៣គីឡូម៉ែត្រ ពីក្រុងសែនមនោរម្យ៕