ភ្នំពេញ៖ បឹងយក្សឡោម ជារមណីយដ្ឋានធម្មជាតិដ៏ល្បីល្បាញ និងជានិមត្តិរូបនៃខេត្តរតនគិរី។ បឹងនេះ ជារូងមួយដែលហ៊ុមព័ទ្ធដោយព្រៃព្រឹក្សាដ៏ក្រាស់ពេលមើលពីលើអាកាស។ សម្តេចធិបតី ហ៊ុន ម៉ាណែត បានលើកឡើងថា បឹងយក្សឡោម គឺជារមណីយដ្ឋានធម្មជាតិដ៏ស្រស់ត្រកាល និងទាក់ទាញបំផុតនៅក្នុងខេត្តរតនគិរី។

ភ្ញៀវទេសចរជាតិ និងអន្តរជាតិ អាចកម្សាន្តសប្បាយនៅបឹងយក្សឡោមជាមួយនឹងទឹកថ្លាយង់ អមជាមួយខ្យល់ត្រជាក់សម្រាប់សម្រាកលំហែ និងស្លៀកពាក់ឈុតជនជាតិដើម ដើម្បីថតរូបអនុស្សាវរីយ៍ ក៏ដូចជាបរិភោគអាហារក្នុងតំបន់ និងផលិតផលក្នុងស្រុកធម្មជាតិជាច្រើន ដែលបានដាក់លក់ហូរហែក្នុងរមណីយដ្ឋាន នៅបឹងយក្សឡោម។

បឹងយក្សឡោម មានចម្ងាយ៣-៤គីឡូម៉ែត្រ ខាងកើតក្រុងបានលុង។ បឹង ដែលកកើតឡើងដោយសារតែភ្នំភ្លើងរលត់ តាំងពីប្រមាណ ៧សែនឆ្នាំកន្លងទៅនេះ មានទទឹងប្រមាណ ៨០០ម៉ែត្រ និងមានជម្រៅប្រហែល ៥០ម៉ែត្រ។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី៦ ខែកញ្ញា ឆ្នាំ២០២៤៕