បានប្រទះឃើញ«ឧទ្ធម្ភាគចក្រក្រយោធា Z9» ដែលបានបាត់ដំណឹងនៅតំបន់ជួរភ្នំក្រវាញ កាលពីថ្ងៃ១៧ថ្ងៃមុន ដោយ ក្រុមប្រតិបត្តិការរុករកប្រទះឃើញពីលើអាកាសនៅចំណុចភ្នំយ៉ាវយ៉ៃ ដែលស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់។ ការរុករកឃើញនេះ បន្ទាប់ពីអាកាសធាតុអំណោយផល និងការស្វះស្វែងបើកប្រតិបត្តិការរុករក អស់រយៈពេល១៧ថ្ងៃ នៅថ្ងៃទី២៩ ខែកក្កដា ឆ្នាំ២០២៤នេះ។ នេះបើតាមរបាយការណ៍ជាបឋមរបស់នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ។

សូមបញ្ជាក់ថា មធ្យោបាយក្នុងការរុករកនេះមានដូចជា ឧទ្ធម្ភាគចក្រ ដ្រូន កងទ័ពថ្មើរជើងមកពីខាងកងទ័ពជើងអាកាស កងទ័ពជើងគោក កងទ័ពជើងពិសេសជាដើម សរុបមានជាង១,០០០នាក់៕