ពោធិ៍សាត់៖ វេទិកាការងារសន្តិសុខសង្គម និងបណ្តុះបណ្តាលវិជ្ជាជីវៈ នឹងនាំយកឱកាសការងារចំនួន ៩០,៨៣៣កន្លែង ជូនអតីតពលករដែលវិលត្រឡប់មកកម្ពុជាវិញ យុវជន និងអ្នកស្វែងរកការងារ នៅខេត្តពោធិ៍សាត់ ក្នុងរយៈពេល២ថ្ងៃ គឺថ្ងៃទី២៨ និងថ្ងៃទី២៩ ខែសីហា ឆ្នាំ២០២៦ ខាងមុខនេះ។

វេទិកានេះ នឹងអនុញ្ញាតឱ្យអ្នកស្វែងរកការងារ ដាក់ពាក្យ និងសម្ភាសការងារភ្លាមៗដោយផ្ទាល់ នៅទីតាំងរៀបចំកម្មវិធី ចាប់ពីម៉ោង ៨:០០ព្រឹក ដល់ម៉ោង ២:០០រសៀល។ សម្រាប់ថ្ងៃទី២៨ ខែសីហា ឆ្នាំ២០២៦ វេទិកានឹងរៀបចំឡើងនៅក្នុងបរិវេណ សាលាស្រុកតាលោសែនជ័យ ខណៈថ្ងៃទី២៩ ខែសីហា ឆ្នាំ២០២៦ នឹងរៀបចំនៅក្នុងបរិវេណ សាលាស្រុកបាកាន។

ជាពិសេស អតីតពលករដែលមានបំណងស្វែងរកការងារ និងចូលរួមក្នុងវេទិកានេះ នឹងទទួលបាន ការដឹកជញ្ជូន អាហារ និងភេសជ្ជៈដោយឥតគិតថ្លៃ។ អាស្រ័យហេតុនេះ អតីតពលករ យុវជន និងអ្នកកំពុងស្វែងរកការងារ ដែលមានចំណាប់អារម្មណ៍ អាចទៅចូលរួមដាក់ពាក្យ និងសម្ភាសការងារដោយផ្ទាល់នៅទីតាំងកម្មវិធី តាមថ្ងៃ និងពេលវេលាដែលបានកំណត់។ សម្រាប់ព័ត៌មានបន្ថែម សូមទាក់ទងតាមលេខទូរស័ព្ទ ១២៩៧។