ភ្នំពេញ៖ រយៈពេល ១ឆ្នាំ នៃឆ្នាំ២០២៥ កម្ពុជា រកចំណូលបានពីភ្ញៀវទេសចរបរទេស លើការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀសសរុបជាង ៤៤,៧១លានដុល្លារ ថយចុះ ៦,៥១% បើធៀបរយៈពេលដូចគ្នាឆ្នាំ២០២៤។ ក្នុងឆ្នាំ២០២៥នេះ កម្ពុជាក៏ទទួលបានភ្ញៀវអន្តរជាតិសរុបជាង ៩៥,៥ម៉ឺននាក់ ថយចុះ ៦,៧% បើធៀបនឹងរយៈពេលដូចគ្នាឆ្នាំ២០២៤។

បើតាមការចុះផ្សាយរបស់គ្រឹះស្ថានអង្គរ កាលពីថ្ងៃទី០១ ខែមករា ឆ្នាំ២០២៦ បានបញ្ជាក់ថា ចំណូលលក់បណ្ណនៅប្រាសាទកោះកែររយៈពេល ១២ខែនេះ កម្ពុជាទទួលបានជាង ៣០,៣៩ម៉ឺនដុល្លារ និងទទួលបានចំនួនភ្ញៀវទេសចរបរទេសសរុប ២០ ២៦៥នាក់។ រីឯ ចំណូលពីការលក់សំបុត្រទូកវិញ កម្ពុជាទទួលបានចំណូលជាង ១,២៤លានដុល្លារ ក្នុងនោះសេវាឈ្នួលទូកទទួលបាន ៥៥,៨០ម៉ឺនដុល្លារ។

ចំពោះ ចំណូលពីការលក់សំបុត្រនៅប្រាសាទបេងមាលាក្នុងរយៈពេល ១២ខែនេះ ទទួលបាន ១៦,៥៨ម៉ឺនដុល្លារ និងទទួលបានទេសចរអន្តរជាតិចំនួន ១៦ ៥៨៥នាក់។ ចំណែក ចំណូលពីការលក់សំបុត្រនៅភ្នំក្បាលស្ពានវិញ ទទួលបាន ៧ ៩៩៥ដុល្លារ និងមានភ្ញៀវបរទេសចំនួន ១ ៥៩៩នាក់៕