ភ្នំពេញ៖ «វេទិកាផ្គូផ្គងធុរកិច្ចទេសចរណ៍អន្តរជាតិ កម្ពុជា-ចិន» ដែលមានការផ្តល់ឱកាសជំនួបធុរកិច្ចរវាងក្រុមហ៊ុនឯកជនផ្នែកទេសចរណ៍កម្ពុជា ជាមួយក្រុមហ៊ុនឯកជនចិន នឹងជំរុញការផ្សព្វផ្សាយសក្តានុពលទេសចរណ៍កម្ពុជា ទៅកាន់ទីផ្សារចិន និងអន្តរជាតិឱ្យកាន់តែទូលំទូលាយ។

ក្នុងវេទិកា ដែលនឹងរៀបចំឡើង ចាប់ពីថ្ងៃទី១៨ ដល់ថ្ងៃទី២០ ខែធ្នូ ឆ្នាំ២០២៥ នៅខេត្តសៀមរាបនេះ នឹងមានកម្មវិធីទស្សនកិច្ច សម្រាប់ប្រតិភូអ្នកទិញ (Buyers) អ្នកសារព័ត៌មាន និង Influencers ល្បីៗមកពីប្រទេសចិនផងដែរ ដើម្បីជំរុញការផ្សព្វផ្សាយយុទ្ធនាការ «ឆ្នាំទេសចរណ៍ កម្ពុជា-ចិន ២០២៥» បន្ថែម។

សូមជម្រាបថា ក្រុមហ៊ុនឯកជននៃប្រទេសចិន មកពីទីក្រុងសំខាន់ៗ រួមមាន៖ ទីក្រុងគ័ងចូវ ទីក្រុងស៊ិនជិន ទីក្រុងគួយលីង ទីក្រុងសៀងហៃ ទីក្រុងណាននីញ និងទីក្រុងដទៃទៀត និងក្រុមហ៊ុនឯកជននៃប្រទេសក្នុងតំបន់អាស៊ាន និងអន្តរជាតិ នឹងមកចូលរួម «វេទិកាផ្គូផ្គងធុរកិច្ចទេសចរណ៍អន្តរជាតិ កម្ពុជា-ចិន»៕