ភ្នំពេញ៖ ឯកឧត្តម ងុយ រិទ្ធ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ជំរុញថ្នាក់ដឹកនាំសហព័ន្ធសហជីព ខិតខំពង្រឹងតួនាទី និងធ្វើការឱ្យបានជិតស្និទ្ធជាមួយសហជីពមូលដ្ឋាន ដើម្បីរាយការណ៍អំពីបញ្ហាវិវាទការងារ និងបញ្ហាប្រឈមនានា នៅតាមបណ្ដារោងចក្រ សហគ្រាស ឱ្យក្រសួងការងារអាចជួយអន្តរាគមន៍ដោះស្រាយទាន់ពេលវេលា ដល់កម្មករនិយោជិត។

ឯកឧត្តម ងុយ រិទ្ធ ក៏បានសរសើរចំពោះសហជីព ដែលបានរួមចំណែកចូលរួមគ្រប់សកម្មភាព ទាំងការងារដែលជាសកម្មភាពសហជីព និងការងារសង្គម ក្នុងស្មារតីរួមគ្នាជួយអភិវឌ្ឍជាតិ។ ក្រៅពីនេះ ឯកឧត្តម ងុយ រិទ្ធ ក៏បានលើកទឹកចិត្តឱ្យប្រធានសហព័ន្ធសហជីព បន្តពង្រឹងសមត្ថភាពសហជីពមូលដ្ឋាន ឱ្យមានការជឿទុកចិត្តពីកម្មករនិយោជិតដែលជាសមាជិក ចៀសវាងឱ្យបានពេលមានបញ្ហាកើតឡើង ទុកឱ្យកម្មករផ្ទុះការតវ៉ាដោយខុសនីតិវិធី ហើយករណីខ្លះឈានទៅបិទផ្លូវសាធារណៈ ដែលជាអំពើល្មើសច្បាប់។

គួរបញ្ជាក់ថា កិច្ចប្រជុំរវាង ក្រសួងការងារ និងសហព័ន្ធសហជីព រៀបចំឡើងជាប្រចាំ ដើម្បីបង្កើនភាពជាដៃគូក្នុងការពិនិត្យដោះស្រាយរាល់បញ្ហារបស់បងប្អូនកម្មករនិយោជិត ក្ដាប់បាននូវបញ្ហាប្រឈមនានា ជាពិសេសបញ្ហាវិវាទការងារ និងបាតុភាពផ្សេងៗ ដែលអាចនឹងកើតមានឡើងជាយថាហេតុ នៅកន្លែងធ្វើការងារ៕