ភ្នំពេញ៖ មជ្ឈមណ្ឌលសកម្មភាពកំចាត់មីនកម្ពុជា (CMAC) ចែករំលែកបទពិសោធក្នុងវិស័យសកម្មភាពមីនដល់បុគ្គលិកអង្គភាពផ្តល់សេវាកម្មរដ្ឋក្នុងគ្រាអាសន្នសម្រាប់ប្រទេសអ៊ុយក្រែន (SESU) ដើម្បីធ្វើប្រតិបត្តិការ ដែលរងផលប៉ះពាល់ដោយសារសំណល់យុទ្ធភណ្ឌសង្រ្គាម ក្នុងគោលបំណងជួយដល់ជនស៊ីវិល។

ក្នុងជំនួបជាមួយ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា, លោក Reva Serhii ប្រធាននាយកដ្ឋានសកម្មភាពមីន SESU សង្ឃឹមថា អ៊ុយក្រែន នឹងទទួលបានសន្តិភាពឆាប់ៗនៅពេលខាងមុខដ៏ខ្លីនេះ ដែលជាគ្រឹះសំខាន់ក្នុងការអភិវឌ្ឍប្រទេសឡើងវិញក្រោយសង្រ្គាម។ សន្តិភាព មិនអាចកើតមានឡើងតាមរយៈការប្រើប្រាស់អាវុធ ឬកម្លាំងទេ ប៉ុន្តែសន្តិភាពត្រូវកើតឡើងដោយការយោគយល់ ការអត់ធ្មត់ និងការចរចារវាងដៃគូជម្លោះទាំងកម្រិតទ្វេភាគី និងអន្តរជាតិ។

លោក Reva Serhii លើកឡើងថា បច្ចុប្បន្ន នៅប្រទេសអ៊ុយក្រែនមានផ្ទៃដីប្រហែល ១៧០.០០០ គីឡូម៉ែត្រក្រឡា ដែលជាតំបន់រងផលប៉ះពាល់ដោយសារសំណល់យុទ្ធភណ្ឌសង្រ្គាម។ ក្នុងឱកាសនោះ លោក Reva Serhii អរគុណចំពោះរដ្ឋាភិបាលជប៉ុន និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ដែលគាំទ្រអ៊ុយក្រែនក្នុងការសហការជាមួយអង្គភាពស៊ីម៉ាក់ ដែលជាស្ថាប័នជាតិបោសសម្អាតមីនឈានមុខគេនៅកម្ពុជា និងកម្រិតអន្តរជាតិ ដែលបាននិងកំពុងផ្តល់ការបណ្តុះបណ្តាលដល់សិក្ខាកាមអ៊ុយក្រែនដែលនឹងពាំនាំបទពិសោធនេះ ទៅបម្រើក្នុងបោសសម្អាតសំណល់យុទ្ធភណ្ឌសង្រ្គាមមនុស្សធម៌នៅក្នុងប្រទេសអ៊ុយក្រែនដែលកំពុងញ៉ាំញីដោយសង្រ្គាម៕