ភ្នំពេញ៖ ស្ថានទូតសហរដ្ឋអាម៉េរិក ប្រកាសផ្តល់ជំនួយថ្មីដែលមានទឹកប្រាក់ចំនួន ៦៧៥ពាន់ដុល្លារ ដើម្បីជួយគាំទ្រការងារបោសសម្អាតមីនដ៏មានសារសំខាន់របស់កម្ពុជា។ នេះបើតាមការចុះផ្សាយរបស់ស្ថានទូតសហរដ្ឋអាម៉េរិកប្រចាំកម្ពុជា កាលពីថ្ងៃទី២៧ ខែកញ្ញា ឆ្នាំ២០២៧។

ជាមួយគ្នានេះ លោកស្រី Bridgette Walker ភារធារីស្ថានទូតសហរដ្ឋអាម៉េរិក បានលើកឡើងថា សហរដ្ឋអាម៉េរិកមានមោទនភាពជាម្ចាស់ជំនួយបោសសម្អាតមីនធំបំផុតនៅកម្ពុជា ដោយបានបរិច្ចាគ ២២០លានដុល្លារ ចាប់តាំងពីឆ្នាំ ១៩៩៣មក ក្នុងនោះ ១២លានដុល្លារ សម្រាប់ឆ្នាំ២០២៥ ដើម្បីផ្តល់លទ្ធភាពដល់ក្រុមគ្រួសារខ្មែរអាចរស់នៅបានដោយសុខសន្តិភាព និងវិបុលភាព។

លោកស្រី Bridgette Walker បានអរគុណដល់អង្គការជំនួយប្រជាពលរដ្ឋន័រវេស្សន៍ (Norwegian People's Aid) និងមជ្ឈមណ្ឌលសកម្មភាពកំចាត់មីនកម្ពុជា (CMAC) ចំពោះការខិតខំប្រឹងប្រែងឥតសំចៃ ដើម្បីធ្វើឱ្យកម្ពុជាអស់គ្រាប់មីន និងអរគុណដល់វិទ្យាស្ថានបច្ចេកទេសកំចាត់មីន ដែលបានពន្យល់លម្អិតអំពីកិច្ចខិតខំប្រឹងប្រែងមហាសាលក្នុងការរៀបចំក្រុមការងារដោះមីនជូនដល់សមាជិកសភាសហរដ្ឋអាមេរិក លោក Adam Smith លោក Michael Baumgartner លោកស្រី Chrissy Houlahan៕