ភ្នំពេញ៖ អាកាសយានដ្ឋានអន្តរជាតិតេជោ និងអាកាសយានដ្ឋានអន្តរជាតិអង្គរសៀមរាប រៀបចំឱ្យមានទីកន្លែងថ្វាយបង្គំ «Praying Room» ដែលជាសម្បទាតម្រូវការដ៏សំខាន់មួយ សម្រាប់សម្រួលដល់ភ្ញៀវទេសចរជាតិ និងភ្ញៀវអន្តរជាតិដែលជាសាសនិកឥស្លាម។ នេះបើតាមការចុះផ្សាយរបស់ ក្រសួងទេសចរណ៍ នាថ្ងៃទី១៤ ខែកញ្ញា ឆ្នាំ២០២៥។

ការរៀបចំឱ្យមានទីកន្លែងថ្វាយបង្គំ «Praying Room» នេះ បង្ហាញពីគោលនយោបាយដ៏ត្រឹមត្រូវ និងប្រាកដនិយម របស់ប្រមុខរាជរដ្ឋាភិបាលកម្ពុជា ដែលធ្វើឱ្យកម្ពុជា ជាប្រទេសមួយដែលមានសុខដុមនីយកម្មសាសនា ឆ្ពោះទៅរកការរីកចម្រើន សុខសន្តិភាព រួមចំណែកក្នុងការអភិវឌ្ឍ ប្រកបដោយចក្ខុវិស័យច្បាស់លាស់ ស្របតាមយុទ្ធសាស្ត្របញ្ចកោណ ដំណាក់កាលទី១ និងស្របជាមួយនឹងផែនការអភិវឌ្ឍន៍ទេសចរណ៍មូស្លីម របស់ក្រសួងទេសចរណ៍ សំដៅបង្កើនភាពទាក់ទាញ និងជំរុញកំណើនទេសចរមូស្លីមមកកាន់កម្ពុជា ឱ្យកាន់តែច្រើនឡើងបន្ថែមទៀត៕