ភ្នំពេញ៖ ក្រសួងទេសចរណ៍ សហការជាមួយសណ្ឋាគារ ណាហ្គាវើល និងសមាគមចុងភៅកម្ពុជា បាននាំយកម្ហូបអាហារអត្តសញ្ញាណខ្មែររួមមាន ហហ្មុកត្រី នំបញ្ចុក និងគ្រាប់ស្វាយចន្ទី តាំងបង្ហាញក្នុងពិព័រណ៍ Food and Hotel Malaysia 2025 នៅទីក្រុងកូឡាឡាំពួរ ប្រទេសម៉ាឡេស៊ី ដែលជាផ្នែកមួយចូលរួមចំណែកលើកកម្ពស់វិស័យម្ហូបអាហារខ្មែរ និងបង្ហាញពីគោលដៅទេសចរណ៍ទាក់ទាញរបស់កម្ពុជាទៅកាន់អន្តរជាតិ។

យោងតាមក្រសួងទេសចរណ៍ បានឱ្យដឹងថាបន្ថែមលើការបង្ហាញម្ហូបអាហារអត្តសញ្ញាណខ្មែរ ក្នុងពិព័រណ៍កម្រិតអន្តរជាតិ ដែលមានការចូលរួមពីតំណាងរដ្ឋាភិបាល និងវិស័យឯកជនជុំវិញពិភពលោកសរុបចំនួន ១,៥០០ស្តង់ ផ្តោតសំខាន់លើការលើកកម្ពស់វិស័យម្ហូបអាហារ សណ្ឋាគារ និងបដិសណ្ឋារកិច្ច យុវជនកម្ពុជា ចំនួន ៣រូប ក៏នឹងចូលរួមការប្រកួតជំនាញធ្វើម្ហូប ក្នុងកម្មវិធី Mamee Asian Culinary Cup ដែលមានបេក្ខជនចូលរួមប្រកួតសរុបចំនួន ៣៦រូប មកពី ១២ប្រទេស នៅក្នុងតំបន់អាស៊ីផងដែរ។

ជាមួយគ្នានេះ ចាប់ពីថ្ងៃទី២២ ដល់ថ្ងៃទី២៦ ខែកញ្ញា ឆ្នាំ២០២៥ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានចូលរួមពិព័រណ៍ Food and Hotel Malaysia 2025 នៅទីក្រុងកូឡាឡាំពួរ ប្រទេសម៉ាឡេស៊ី ក្រោមកិច្ចសហការជាមួយក្រុមហ៊ុន Informa Markets។ តាមរយៈពិព័រណ៍នេះ ក្រសួងទេសចរណ៍នឹងជំរុញផ្សព្វផ្សាយគោលដៅទេសចរណ៍កម្ពុជា បានកាន់តែល្អប្រសើរថែមទៀតលើឆាកអន្តរជាតិ ជាពិសេសផ្សព្វផ្សាយ និងទាក់ទាញអ្នកវិនិយោគលើវិស័យម្ហូបអាហារ ព្រមទាំងជំរុញលើកកម្ពស់ជំនាញវិជ្ជាជីវៈទេសចរណ៍ផងដែរ៕