ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) ពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ៥គម្រោង មានទុនវិនិយោគសរុបប្រមាណ ៤៦លានដុល្លារ អាចបង្កើតការងារបានប្រមាណ ២ពាន់កន្លែង។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១២ ខែកញ្ញា ឆ្នាំ២០២៥។

គម្រោងវិនិយោគចំនួន ៥នេះ មានមុខសញ្ញាវិនិយោគក្នុងវិស័យឧស្សាហកម្មចំនួន ៤គម្រោង ផលិតគ្រឿងសង្ហារិម, ផលិតឧបករណ៍លើកដាក់, ឧបករណ៍ជាង និងសម្ភារៈបន្ទាប់បន្សំ ពីលោហៈធាតុ និងប្លាស្ទិក, ផលិតសម្ភារៈប្រើប្រាស់ និងតុបតែងលម្អក្នុងផ្ទះ ធ្វើពីប្លាស្ទិក និងលោហៈធាតុ និងផលិតសម្ភារៈកីទ្បា និងវិស័យកសិ-ឧស្សាហកម្មចំនួន ១គម្រោង គឺគម្រោងរោងចក្រកែច្នៃដំទ្បូងមី និងផលិតជី។

គម្រោងវិនិយោគទាំង៥ ដែលរៀបចំកិច្ចប្រជុំច្រកចេញចូលតែមួយដោយឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា គឺបានបោះទីតាំងនៅខេត្តកណ្តាល ព្រះសីហនុ និងកំពង់ធំ៕