ភ្នំពេញ៖ លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម ដឹកនាំចុះពិនិត្យទីតាំងលានហាល/ឡសម្ងួតពោតក្រហម នៅខេត្តបាត់ដំបង និងខេត្តប៉ៃលិន ដើម្បីប្រមូលទិន្នន័យស្តុកពោតក្រហម និងសិក្សាពីបរិមាណ ដែលអាចផ្គត់ផ្គង់ឱ្យក្រុមហ៊ុនផលិតចំណីសត្វ។

ក្នុងឱកាសចុះពិនិត្យ កាលពីថ្ងៃទី១៦ ខែសីហា ឆ្នាំ២០២៥ នេះដែរ ក្រុមការងារ បានចុះមើលលានហាល/ឡសម្ងួតចំនួន ៧កន្លែង នៅស្រុកសំពៅលូន និងស្រុកភ្នំព្រឹក ខេត្តបាត់ដំបង ព្រមទាំងចំនួន ១៤កន្លែង នៅខណ្ឌសាលាក្រៅ និងក្រុងប៉ៃលិន ខេត្តប៉ៃលិន ដែលមានការចូលរួមពីនាយកដ្ឋានអភិវឌ្ឍន៍វិស័យឯកជន, ក្រុមហ៊ុន ហ្គ្រីនត្រេដ, មន្ទីរពាណិជ្ជកម្មខេត្តប៉ៃលិន, មន្ទីរពាណិជ្ជកម្មខេត្តបាត់ដំបង, អភិបាលស្រុកសំពៅលូន អភិបាលស្រុកភ្នំព្រឹក ព្រមទាំងក្រុមហ៊ុនផលិតចំណីសត្វ ជាច្រើនរូបផងដែរ។

លោកជំទាវរដ្ឋលេខាធិការពាណិជ្ជកម្ម ក៏បានដឹកនាំកិច្ចប្រជុំពិភាក្សាជាមួយអាជ្ញាធររដ្ឋបាលស្រុកសំពៅលូន និងស្រុកភ្នំព្រឹក ដើម្បីបង្ហាញពីគោលបំណងនៃដំណើរបេសកកម្ម និងស្តាប់មតិយោបល់ចូលរួមរបស់អាជ្ញាធរលើបញ្ហាជុំវិញពោតក្រហម ផងដែរ៕