ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ស្នើឱ្យសមាគមពាណិជ្ជករហ៊ូប៉ីឈូនៅកម្ពុជា បន្តជួយផ្សព្វផ្សាយគោលដៅទេសចរណ៍របស់កម្ពុជា ជាពិសេសខេត្តសៀមរាប និងខេត្តព្រះសីហនុ និងគោលដៅដទៃទៀត ដើម្បីទាក់ទាញប្រជាជនចិន និងប្រជាជនក្នុងតំបន់ខេត្តហ៊ូប៉ី ឱ្យធ្វើដំណើរមកទេសចរណ៍នៅកម្ពុជាកាន់តែច្រើន។

ក្នុងជំនួបនេះ លោក ម៉ៅ ដេមីង (Mr. MAO Deming) នាយកប្រតិបត្តិសមាគមពាណិជ្ជករហ៊ូប៉ីឈូនៅកម្ពុជា បានបញ្ជាក់ថា សមាគមពាណិជ្ជករហ៊ូប៉ីឈូនៅកម្ពុជា ដែលជាខេត្តមានប្រជាជនជិត ៦០លាននាក់ នៃប្រទេសចិន បានបេ្តជ្ញាចូលរួមជាមួយក្រសួងទេសចរណ៍ ដើម្បីជំរុញការអភិវឌ្ឍវិស័យទេសចរណ៍ និងកំណើនភ្ញៀវទេសចរចិននៅកម្ពុជា។

ជាមួយគ្នានេះ ឯកឧត្តម ហួត ហាក់ ក៏បានស្នើឱ្យសមាគម ជួយផ្សព្វផ្សាយពីកាលានុវត្តវិនិយោគ ដើម្បីទាក់ទាញវិនិយោគិនពីតំបន់ខេត្តហ៊ូប៉ី មកធ្វើការវិនិយោគនៅកម្ពុជា និងការរៀបចំ FAM TRIP ពីប្រតិភូ ផ្នែកទេសចរណ៍ វិនិយោគ និងសារព័ត៌មានពីខេត្តហូប៉ីមកប្រទេសកម្ពុជា និងបន្តកិច្ចសហការរួមគ្នារបស់សមាជិកសមាគមដែលបានរៀបចំ Chartered Flight ជូនភ្ញៀវទេសចរចិនមកទស្សនាប្រទេសកម្ពុជាឱ្យកាន់តែច្រើនឡើងបន្ថែមទៀត៕