ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈកម្ពុជា និងសេវាការងារ និងមុខរបរ នៃក្រសួងមុខរបរ និងការងារសាធារណរដ្ឋកូរ៉េ ចុះអនុស្សរណៈនៃការយោគយល់គ្នា (MoU) បន្តកិច្ចសហប្រតិបត្តិការសម្រាប់ ឆ្នាំ២០២៥-២០២៨ ដើម្បីចូលរួមអនុវត្តគោលនយោបាយ និងអភិវឌ្ឍសង្គមក្នុងវិស័យការងារ នៅកម្ពុជា ឱ្យកាន់តែល្អប្រសើរ។

ការចុះផ្សាយរបស់ ក្រសួងការងារ នាថ្ងៃទី៩ ខែសីហា ឆ្នាំ២០២៥ បញ្ជាក់ថា តាមរយៈកិច្ចសហប្រតិបត្តិការនេះ ភាគីទាំងពីរ នឹងផ្លាស់ប្តូរបទពិសោធ គាំទ្រផ្នែកបច្ចេកទេសផ្តោតលើផ្នែកអាទិភាពសំខាន់ៗក្នុងវិស័យការងារ រួមមានប្រាក់ឈ្នួលអប្បបរមា ការដោះស្រាយវិវាទការងារ អធិការកិច្ចការងារ និងការបណ្តុះបណ្តាល។

ក្នុងពិធីចុះ MoU នេះ ឯកឧត្ដម លឹម ស៊ុយហុង អនុរដ្ឋលេខាធិការក្រសួងការងារ និង ឯកឧត្តម PARK Jong Pill អគ្គលេខាធិការ និងជានាយកប្រតិបត្តិ នៃសេវាការងារ និងមុខរបរ នៃក្រសួងមុខរបរកូរ៉េ បេ្ដជ្ញាបន្តជំរុញនូវការអនុវត្តកិច្ចសហការ ដោយអនុលោមតាម MoU នេះ ឱ្យដំណើរការប្រកបដោយប្រសិទ្ធភាព និងប្រសិទ្ធផល ព្រមទាំងពង្រឹងកិច្ចសហប្រតិបត្តិការនានា រវាងប្រទេសទាំងពីរឱ្យកាន់តែល្អប្រសើរថែមទៀត៕