ភ្នំពេញ៖ ប្រជាកសិករ ១១២គ្រួសារ នៅតំបន់កង្ហត ខេត្តបាត់ដំបង ស្ម័គ្រចិត្តរួមគ្នាចងក្រងជាសហគមន៍កសិកម្មទំនើប និងត្រៀមចុះកិច្ចសន្យាដាំស្រូវស្រង៉ែស្រាលលក់ក្នុងតម្លៃ ១ពាន់រៀល ក្នុងមួយគីឡូក្រាម លើផ្ទៃដី ៥០០ហិកតា នៅរដូវកាលបន្ទាប់នេះ។

ពាក់ព័ន្ធនឹងការចងក្រងជាសហគមន៍កសិកម្មនេះ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្មរុក្ខាប្រមាញ់ និងនេសាទ បញ្ជាក់ថា កសិករដែលចាប់អារម្មណ៍ អាចទំនាក់ទំនងមកឯកឧត្តមផ្ទាល់ ដើម្បីចងក្រងជាសហគមន៍កសិកម្មទំនើប រួចចុះកិច្ចសន្យាទុកមុនតែម្តង។

គួរបញ្ជាក់ថា បច្ចុប្បន្ន ក្រសួងកសិកម្ម មានទីផ្សារស្រាប់នៅក្នុងដៃសម្រាប់ស្រូវស្រង៉ែស្រាលចំនួន ២ម៉ឺនតោន ក្នុងតម្លៃកុងត្រាមុន ១ពាន់រៀល ក្នុងមួយគីឡូក្រាម តែលក្ខខណ្ឌគឺត្រូវផលិតរួមគ្នាជាសហគមន៍ទើបអាចទទួលបានតម្លៃពិសេសនេះ។ នេះបើតាមការចុះផ្សាយរបស់ ឯកឧត្តម ឃឹម ហ្វីណង់ នាថ្ងៃទី៨ ខែសីហា ឆ្នាំ២០២៥៕