ភ្នំពេញ៖ កម្ពុជា បានធ្វើពិពិធកម្មឧស្សាហកម្មទៅកាន់វិស័យផ្សេងៗ ក្រៅពីវិស័យកាត់ដេរសម្លៀកបំពាក់ ស្បែកជើង និងកាបូប ដូចជាការផ្គុំដំឡើងយានយន្ដនិងគ្រឿងបង្គុំយានយន្ត, ផលិតសំបកកង់រថយន្ត, កង់, សម្ភារបរិក្ខារអេឡិចត្រូនិក និងគ្រឿងសង្ហារិម។ នេះបើតាមការលើកឡើងរបស់ ឯកឧត្តម លឹម វិសាល អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា។

ឯកឧត្តម លឹម វិសាល បន្តថា កម្ពុជា បានធ្វើពិពិធកម្មឧស្សាហកម្មបរិក្ខារអគ្គិសនី និងអំពូលលម្អ, សម្ភារតុបតែងលម្អដើមគ្រីសស្មាស់ និងក្តារបន្ទះជាដើម។ ក្នុងកិច្ចពិភាក្សាស្តីពី «ឱកាសធុរកិច្ច និងវិនិយោគនៅកម្ពុជា» នៅមជ្ឈមណ្ឌលសន្និបាត និងពិព័រណ៍កោះពេជ្រ ឯកឧត្តម លឹម វិសាល ក៏បានមានប្រសាសន៍ថា វិស័យទាំងអស់នេះ ប្រើប្រាស់បច្ចេកវិទ្យាមធ្យម និងតម្លៃបន្ថែមសមរម្យ។ ក្នុងន័យនេះ ឯកឧត្តមអគ្គលេខាធិការរងមានសុទិដ្ឋិនិយមខ្ពស់ថា ឧស្សាហកម្មថ្មីទាំងនេះ នឹងបន្តហូរចូលមកកម្ពុជាបន្ថែមទៀត អាស្រ័យដោយរាជរដ្ឋាភិបាល កំពុងខិតខំប្រឹងប្រែងក្នុងការបន្តដាក់ចេញនូវគោលនយោបាយ និងវិធានការគាំទ្រដល់វិស័យឯកជន សំដៅលើកកម្ពស់បរិយាកាសវិនិយោគ និងធុរកិច្ចនៅកម្ពុជា ឱ្យកាន់តែមានភាពប្រកួតប្រជែង។

ឯកឧត្តម លឹម វិសាល ក៏បានបន្តលើកឡើងអំពីស្ថានភាពវិនិយោគទូទៅនៅកម្ពុជា, របបលើកទឹកចិត្តប្រកបដោយភាពទាក់ទាញក្រោមច្បាប់ស្តីពី វិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន និងសក្តានុពលវិនិយោគក្នុងវិស័យអាទិភាពមួយចំនួន។ កិច្ចពិភាក្សាខាងលើនេះ ជាកម្មវិធីមួយក្នុងព្រឹត្តិការណ៍ពិព័រណ៍ «ឧស្សាហកម្មគ្រឿងយន្តកម្ពុជាអន្តរជាតិ» និងព្រឹត្តិការណ៍ពិព័រណ៍ «សម្លៀកបំពាក់ និងវាយភ័ណ្ឌកម្ពុជាអន្តរជាតិ» លើកទី៩ ដែលត្រូវបានរៀបចំចាប់ពីថ្ងៃទី៦ ដល់ថ្ងៃទី៩ ខែសីហា ឆ្នាំ២០២៥៕