ភ្នំពេញ៖ លោក ឡុង ឌីម៉ង់ អភិបាលរងខេត្តព្រះសីហនុ និងជាអនុប្រធានអនុគណៈកម្មាធិការវិនិយោគខេត្តព្រះសីហនុ ស្នើឱ្យម្ចាស់រោងចក្រកែច្នៃឈើដាំ ពីដើមអាកាស្យា និងដើមប្រេងខ្យល់ អនុវត្តតាមការណែនាំរបស់មន្ទីរអង្គភាពជំនាញ និងផ្តល់អាទិភាពការងារដល់ពលករ ដែលត្រឡប់មកពីប្រទេសថៃវិញ។

ក្នុងឱកាសចុះពិនិត្យទីតាំងស្នើសុំបង្កើតរោងចក្រកែច្នៃឈើដាំ ដែលមានទីតាំងស្ថិតនៅភូមិសាមគ្គី ស្រុកព្រៃនប់ ខេត្តព្រះសីហនុ និងមានទុនវិនិយោគសរុបប្រមាណ ៤,៦៩លានដុល្លារអាម៉េរិក លោក ឡុង ឌីម៉ង់ បានណែនាំដល់អ្នកវិនិយោគឱ្យសហការជាមួយអាជ្ញាធរពាក់ព័ន្ធ ដើម្បីបំពេញលក្ខខណ្ឌនានា ដែលច្បាប់បានកំណត់។

អនុគណៈកម្មាធិការវិនិយោគខេត្តព្រះសីហនុ ដែលដឹកនាំដោយ លោកឡុង ឌីម៉ង់ ក៏បានពិនិត្យលទ្ធភាពជួយសម្របសម្រួលនីតិវិធីមួយចំនួន ដែលស្ថិតនៅក្នុងដែនសមត្ថកិច្ចរបស់អនុគណៈកម្មាធិការវិនិយោគខេត្ត ដើម្បីកាត់បន្ថយរយៈពេលរងចាំច្បាប់អនុញ្ញាតរបស់ក្រុមហ៊ុនផងដែរ។ នេះបើតាមការចុះផ្សាយរបស់រដ្ឋបាលខេត្តព្រះសីហនុ កាលពីថ្ងៃទី២៨ ខែមិថុនា ឆ្នាំ២០២៥៕