ភ្នំពេញ៖ ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ឆ្លើយតបទៅកាន់យោធាថៃថា៖ «យុទ្ធវិធីការពារជាតិរបស់កម្ពុជា ពេលបំពាក់សព្វាវុធ គឺដើម្បីការពារបូរណភាពទឹកដី ច្បាស់ណាស់គោលដៅ ត្រូវតម្រង់ទៅខ្មាំងសត្រូវ មិនដែលមានក្បួនទ័ពណាដែលបង្វែរកាណុង មកផ្ទះខ្លួនឯងនោះទេ»។

ការឆ្លើយតបរបស់ ឯកឧត្តមនាយឧត្តមសេនីយ៍ ទៀ សីហា ធ្វើឡើងក្រោយយោធាថៃចោទថា៖ «កម្ពុជាបង្វែរកាណុងកាំភ្លើងទៅភូមិដ្ឋាន និងបន្ទាយរបស់យោធាថៃ»។ បន្ថែមពីលើសំណេរខាងលើនេះ ឯកឧត្តមនាយឧត្តមសេនីយ៍ ទៀ សីហា ក៏បានចោទសួរទៅកាន់យោធាថៃផងដែរ ថា «ឬមួយកងទ័ពថៃ រៀនយុទ្ធវិធី ខុសពីកម្ពុជា?»។

រដ្ឋមន្រ្តីក្រសួងការពារជាតិ ក៏បានបញ្ជាក់ពីជំហរកម្ពុជាថា ជម្រើសសន្តិវិធី គឺការចរចារវាងរដ្ឋាភិបាលទាំងពីរ ទាំងផ្នែកនយោបាយ ផ្នែកសេដ្ឋកិច្ច និងផ្នែកផ្សេងៗ និងចំពោះផ្នែកយោធា គឺជម្រើសចុងក្រោយ។ «យើងត្រៀមរួចជាស្រេចក្នុងការការពារទឹកដីកម្ពុជា ដោយគ្មានមហិច្ឆតាឈ្លានពានទៅប្រទេសជិតខាងឡើយ»។ នេះបើតាមការលើកឡើងរបស់ ឯកឧត្តមនាយឧត្តមសេនីយ៍ ទៀ សីហា នាថ្ងៃទី១៦ ខែមិថុនា ឆ្នាំ២០២៥៕