ភ្នំពេញ៖ សម្តេចធិបតី ហ៊ុន ម៉ាណែត នឹងចូលរួមកិច្ចប្រជុំកំពូលអាស៊ាន លើកទី៤៦ នៅទីក្រុងគូឡាឡាំពួ ប្រទេសម៉ាឡេស៊ី ថ្ងៃទី២៦-២៧ ខែឧសភា ឆ្នាំ២០២៥ ក្រោមប្រធានបទ «បរិយាបន្ន និងចីរភាព» ដែលផ្តោតលើការជំរុញការកសាងសហគមន៍អាស៊ាន និងអនុម័តចក្ខុវិស័យសហគមន៍អាស៊ាន ឆ្នាំ២០៤៥។ ព្រឹត្តិការណ៍ដ៏សំខាន់មួយនេះ គឺជាការបញ្ជាក់ឡើងវិញពីការលើកកម្ពស់ការប្តេជ្ញាចិត្តរួមគ្នារបស់តំបន់អាស៊ាន។

ក្នុងឱកាសចូលរួមកិច្ចប្រជុំ តបតាមការអញ្ជើញរបស់ ឯកឧត្តម ដាតុ ស៊េរី អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធាននៃកិច្ចប្រជុំកំពូលអាស៊ាន ឆ្នាំ២០២៥ សម្តេចធិបតី ហ៊ុន ម៉ាណែត ក៏នឹងចូលរួមក្នុងកិច្ចប្រជុំកំពូលពាក់ព័ន្ធផងដែរ។ កិច្ចប្រជុំកំពូលពាក់ព័ន្ធនេះ គឺជាវេទិកាសម្រាប់អាស៊ានក្នុងការពង្រឹង និងពង្រីកទំនាក់ទំនងជាមួយក្រុមប្រឹក្សាសហប្រតិបត្តិការឈូងសមុទ្រ (GCC) ក្នុងការប្រាស្រ័យទាក់ទងជាមួយ GCC និងប្រទេសចិន លើកិច្ចសហប្រតិបត្តិការសេដ្ឋកិច្ច នៅចំពោះមុខការប្រែប្រួលទិដ្ឋភាពភូមិសាស្ត្រ នយោបាយ និងសេដ្ឋកិច្ច។

អំឡុងពេលនៃការចូលរួមកិច្ចប្រជុំរយៈពេលពីរថ្ងៃ នៅទីក្រុងគូឡាឡាំពួ ដែលអមដំណើរដោយ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រួមមាន ឯកឧត្តម ប្រាក់ សុខុន រដ្ឋមន្ត្រីការបរទេស និងមន្ត្រីសំខាន់ៗនៃរាជរដ្ឋាភិបាល តំណាងពីសភាពាណិជ្ជកម្មកម្ពុជា សម្តេចធិបតី ហ៊ុនម៉ាណែត ក៏នឹងមានជំនួបទ្វេភាគីជាមួយថ្នាក់ដឹកនាំអាស៊ាន និងពិភពលោកមួយចំនួនផងដែរ ដើម្បីពង្រឹងឱ្យកាន់តែស៊ីជម្រៅនូវទំនាក់ទំនងទ្វេភាគី លើបញ្ហាដែលមានផលប្រយោជន៍ និងក្តីបារម្ភរួម។ នេះបើតាមសេចក្តីប្រកាសរបស់ ក្រសួងការបរទេស នាថ្ងៃទី២៣ ខែឧសភា ឆ្នាំ២០២៥៕