ភ្នំពេញ៖ គ្រឿងក្នុងជ្រូកដែលចូលមកពីប្រទេសថៃខុសលក្ខណៈបច្ចេកទេស និងគ្មានលិខិតអនុញ្ញាត ចំនួន ២០កេស ដែលស្មើនឹង ១០០០គីឡូក្រាម ត្រូវបានមន្រ្តីជំនាញអធិការកិច្ចម្ហូបអាហារ នៃសាខា ក.ប.ប. ខេត្តបាត់ដំបង ជាមួយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការនគរបាលខេត្តដឹកនាំដោយលោកទុត វីនីត ព្រះរាជអាជ្ញារងនៃអយ្យុការអមសាលាដំបូងខេត្តបាត់ដំបង ដុតចោលនៅថ្ងៃទី១៨ ខែឧសភា ឆ្នាំ២០២៥។

គ្រឿងក្នុងជ្រូកនេះ ត្រូវបានបង្ក្រាបនៅចំនុចផ្លូវជាតិលេខ៥ រង្វង់មូលស្រុកថ្មគោល ស្ថិតនៅស្រុកថ្មគោល ខេត្តបាត់វដំបងដែល ក្នុងប្រតិបត្តិការនេះ សមត្ថកិច្ចបានឃាត់រថយន្តមួយគ្រឿងម៉ាក Toyota Highlander ពណ៌ទឹកមាស ឆ្នាំ២០០៣ ពាក់ផ្លាកលេខ ភ្នំពេញ ២AU -៩៧៦៤ បើកបរដោយឈ្មោះ ញា ចិន្តា ភេទប្រុស អាយុ ៤២ឆ្នាំរស់នៅខេត្តបន្ទាយមានជ័យ ដែលរកឃើញគ្រឿងក្នុងជ្រូកចំនួន២០។

ទំនិញដែលត្រូវបាន វេចខ្ចប់ និងដឹកជញ្ជូន ពុំមានលក្ខណៈបច្ចេកទេសស្របតាមគុណភាព សុវត្ថិភាពម្ហូបអាហារសម្រាប់មនុស្សបរិភោគនេះ ត្រូវបានមន្រ្តីការិយាល័យផលិតកម្ម មន្ត្រីបសុព្យាបាល មន្ត្រីសាខា (ក.ប.ប) ខេត្តបាត់ដំបង និងមន្រ្តីនគរបាល យកទៅដុតបំផ្លាញចោលនៅទីលានចាក់សំរាម ស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង រីឯអ្នកដឹកជញ្ជូន សមត្ថកិច្ចនឹងបន្តនីតិវិធីទៅតាមផ្លូវច្បាប់។ នេះបើតាមការចុះផ្សាយរបស់ស្នងការដ្ឋាននគរបាលខេត្តបាត់ដំបង កាលពីថ្ងៃទី១៨ ខែឧសភា ឆ្នាំ២០២៥៕