ភ្នំពេញ៖ ក្រសួងកសិកម្ម រដ្ឋបាលខេត្តបាត់ដំបង និងក្រសួងពាណិជ្ជកម្ម កំពុងធ្វើការយ៉ាងសកម្មក្នុងការចរចាជាមួយភាគីថៃ ដើម្បីដោះស្រាយបញ្ហារឹតបន្តឹង «ការនាំចេញផ្លែល្ពៅក្រៅផ្លូវការ» ទៅកាន់ប្រទេសថៃ នៅតាមច្រកព្រំដែនគោកក្នុងភូមិសាស្ត្រខេត្តបាត់ដំបង។ នេះបើតាមការឱ្យដឹងពី ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ។

ឯកឧត្តម ឃឹម ហ្វីណង់ បញ្ជាក់ថា បញ្ហាខាងលើនេះ បានបណ្តាលឱ្យមានការជន់ជោរផ្លែល្ពៅនាំចេញមិនបាន នៅលើទីផ្សារក្នុងស្រុក និងត្រូវបានឈ្មួញ យកទៅចែកចាយដោយឥតគិតថ្លៃ ដែលកំពុងមានការចាប់អារម្មណ៍នៅលើបណ្តាញសង្គម។ បច្ចុប្បន្នកម្ពុជា នៅមិនទាន់ទទួលបានការឆ្លើយតបវិជ្ជមានពីភាគីថៃនៅឡើយទេ ប៉ុន្តែក្រសួង នឹងបន្តកិច្ចសហការជាមួយស្ថាប័នពាក់ព័ន្ធទាំងអស់ ដើម្បីជួយដោះស្រាយបញ្ហានេះឱ្យបានឆាប់ និងផ្តល់បច្ចុប្បន្នភាពពីវឌ្ឍនភាពជាបន្តបន្ទាប់។

ការនាំចេញផ្លែល្ពៅទៅថៃនេះ គឺពេលកន្លងមក ជាការនាំចេញក្រៅផ្លូវការ ដោយមិនមានវិញ្ញានបណ្ណបត្រភូតគាមអនាម័យ (SPS) ត្រឹមត្រូវឡើយ ដែលស្ថានភាពបែបនេះ ងាយជួបបញ្ហានៅក្នុងការធ្វើពាណិជ្ជកម្មណាស់។ ក្រសួងកសិកម្ម កំពុងធ្វើការយ៉ាងសកម្ម ដើម្បីចរចារលើរឿងនេះ និងមុខដំណាំថ្មីៗបន្ថែមទៀត ព្រមទាំងលើកទឹកចិត្តឱ្យអ្នកនាំចេញកសិផលអនុលោមតាមនីតិវិធីស្របច្បាប់ឱ្យបានច្រើនជាងមុន។ នេះបើតាមការចុះផ្សាយនៅគេហរទំព័ររបស់ ឯកឧត្តម ឃឹម ហ្វីណង់ នាថ្ងៃទី១០ ខែឧសភា ឆ្នាំ២០២៥៕