ភ្នំពេញ៖ សមាគមសហគ្រិនវ័យក្មេងកម្ពុជា និងអង្គការពាណិជ្ជកម្មក្រៅប្រទេសជប៉ុន (JETRO) ប្រចាំកម្ពុជា ប្តេជ្ញាសហការលទ្ធភាពកម្រិតណាមួយ ដើម្បីលើកកម្ពស់ភាពជាដៃគូធុរកិច្ចរវាងកម្ពុជា និងជប៉ុន ជាពិសេសលើវិស័យពាណិជ្ជកម្ម និងការទាក់ទាញការវិនិយោគ។

ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា បានលើកឡើងពីគណៈកម្មការសម្របសម្រួលការវិនិយោគរបស់សមាគម ដែលបានបង្កើតឡើងដើម្បីជួយស្វែងរកអ្នកវិនិយោគ និងផ្តល់ភាពងាយស្រួសសម្រាប់អ្នកវិនិយោគក្រៅស្រុក និងស្ថាប័នដែលពាក់ព័ន្ធផ្សេងៗ តាមរយៈសមាគម។ ឧកញ៉ា ប៉ិច បូឡែន លើកឡើងដូច្នេះ ក្នុងកិច្ចពិភាក្សាការងារជាមួយ លោក Kohei Wakabayashi តំណាងអង្គការ JETRO ប្រចាំកម្ពុជា។

ក្នុងឱកាសនោះ លោក Kohei Wakabayashi បានមានប្រសាសន៍អំពីគម្រោងវិនិយោគធំៗមួយចំនួនរបស់ JETRO ដែលនឹងផ្តល់អត្ថប្រយោជន៍ដល់សហគ្រិននៅកម្ពុជា ព្រមទាំងបើកឱកាសសហការបន្ថែមទៀតជាមួយសមាគមផងដែរ។ តាមការបញ្ជាក់របស់ លោក Kohei Wakabayashi JETRO ក៏នឹងរៀបចំជំនួបរវាងសហគ្រិនកម្ពុជា និងជប៉ុនចំនួន ២ដងទៀត ក្នុងឆ្នាំ២០២៥ នេះផងដែរ៕