ភ្នំពេញ៖ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជំរុញឱ្យគណៈប្រតិភូធុរកិច្ចខេត្តហៃណាន ប្រទេសចិន ពិនិត្យលទ្ធភាពស្វែងរកឱកាសវិនិយោគក្នុងប្រទេសកម្ពុជា ដោយផ្ដោតលើការកែច្នៃ វេចខ្ចប់ ធ្វើទីផ្សារ និងនាំចេញ។

ក្នុងជំនួបជាមួយ គណៈប្រតិភូធុរកិច្ចខេត្តហៃណាន នាថ្ងៃទី២៣ ខែមេសា ឆ្នាំ២០២៥ ឯកឧត្តម ប្រាក់ ដាវីដ បានគូសបញ្ជាក់អំពីការចុះកិច្ចព្រមព្រៀងលើពិធីសារនូវផលិតផល ៣មុខបន្ថែមទៀត ក្នុងនោះមានដូចជា៖ សំបុកត្រចៀកកាំ ទុរេន និងសត្វក្រពើ និងផលិតផលផ្សេងទៀត ដែលកំពុងបានពិភាក្សាបន្ត ក្នុងគោលដៅជំរុញកសិ-ពាណិជ្ជកម្មបន្ថែម រវាងប្រទេសទាំងពីរ។

រដ្ឋលេខាធិការក្រសួងកសិកម្មរូបនេះ ក៏បានលើកឡើងពីទស្សនកិច្ចរបស់ ឯកឧត្តម ស៊ី ជីងពីន ប្រធានាធិបតីនៃសាធារណរដ្ឋប្រជាមានិតចិន ដែលបានមកបំពេញទស្សនកិច្ចផ្លូវរដ្ឋនៅកម្ពុជា ព្រមទាំងបានលើកឡើងពីភាពរឹងមាំនៃទំនាក់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ដែលជាដៃគូយុទ្ធសាស្ត្រគ្រប់ជ្រុងជ្រោយ ជាមិត្តដែកថែប និងការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី គ្រប់រដូវកាល។ នេះបើតាមការចុះផ្សាយរបស់ ក្រសួងកសិកម្ម រុក្ខាប្រមាញ់ និងនេសាទ៕