ភ្នំពេញ៖ រដ្ឋាភិបាលកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ(KOICA) ផ្តល់ជំនួយឥតសំណងប្រមាណ ៧លានដុល្លារ ដើម្បីពង្រឹងប្រព័ន្ធសុខាភិបាលសាធារណៈគ្រប់ជ្រុងជ្រោយក្នុងខេត្តរតនគិរី។ ជំនួយសម្រាប់គាំទ្រប្រព័ន្ធសុខាភិបាលនេះ ចុះហត្ថលេខាដោយលោកស្រី ឆេ មូន ជុង នាយិកា KOICA ប្រចាំកម្ពុជា ជាមួយឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល កាលពីថ្ងៃទី៧ ខែមេសា ឆ្នាំ២០២៥។

ការចុះហត្ថលេខានេះ ឯកឧត្តម ឈាង រ៉ា បានអរគុណចំពោះការរួមចំណែករបស់ប្រជាជន និងរដ្ឋាភិបាលកូរ៉េ ដែលតែងតែគាំទ្រប្រព័ន្ធសុខាភិបាលកម្ពុជា តាមរយៈជំនួយឥតសំណងសម្រាប់ការអភិវឌ្ឍនិងធ្វើឱ្យប្រសើរឡើងនូវហេដ្ឋារចនាសម្ព័ន្ធ ព្រមទាំងការអភិវឌ្ឍធនធានមនុស្សក្នុងវិស័យសុខាភិបាល ដែលស្របទៅនឹងអាទិភាពចម្បងបំផុតរបស់ក្រសួងសុខាភិបាល។

ទន្ទឹមនឹងនេះ លោកស្រី ម៉ូន ជុង ឆេ លើកឡើងថា តាមរយៈកិច្ចព្រមព្រៀងនេះ នឹងបង្កើនលទ្ធភាព គុណភាពនៃសេវាថែទាំសុខភាព ពង្រឹងសមត្ថភាព និងមុខងារប្រតិបត្តិការនៃប្រព័ន្ធសុខាភិបាលសាធារណៈ រួមទាំងមន្ទីរពេទ្យបង្អែកខេត្ត ក្នុងខេត្តរតនគិរី ចាប់ពីឆ្នាំ២០២៥ ដល់ឆ្នាំ២០៣០។ នេះបើតាមការចុះផ្សាយរបស់ក្រសួងសុខាភិបាល កាលពីថ្ងៃទី០៧ ខែមេសា ឆ្នាំ២០២៥៕