ភ្នំពេញ៖ កម្ពុជា-ជប៉ុន នឹងរៀបចំជំនួបរវាងវិស័យឯកជនក្នុងវិស័យទេសចរណ៍ នៃប្រទេសទាំងពីរ តាមរយៈការរៀបចំទស្សនកិច្ចឱ្យវិស័យឯកជនជប៉ុនមកស្វែងយល់ពីទេសចរណ៍កម្ពុជា (FAM Trip)។ នេះបើតាមកិច្ចពិភាក្សារវាង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និង ឯកឧត្តម UENO Atsushi ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំកម្ពុជា។

ដើម្បីបង្កើនការផ្សព្វផ្សាយអំពីសក្តានុពលវិស័យទេសចរណ៍ ប្រទេសទាំងពីរ ឯកឧត្តម ហួត ហាក់ និងឯកឧត្តម UENO Atsushi ក៏បានជជែកពីការរៀបចំព្រឹត្តការណ៍ពិព័រណ៍ទេសចរណ៍អន្តរជាតិ Japan Expo 2025 នៅទីក្រុង Osaka, ការជំរុញឱ្យមានជើងហោះហើរត្រង់រវាងកម្ពុជា និងជប៉ុន, កិច្ចសហការថតវីដេអូរអំពីទេសចរណ៍ និងបង្កើនការទិញលក់កញ្ចប់ទស្សនកិច្ចរវាងប្រទេសទាំងពីរឱ្យច្រើនបន្ថែមទៀត។

ក្នុងជំនួប នៅទីស្តីការក្រសួងទេសចរណ៍ ឯកឧត្តម UENO Atsushi ក៏បានសន្យាបន្តជួយផ្សព្វផ្សាយអំពីសភាពការណ៍សង្គម សន្តិសុខ និងសុវត្ថិភាពពិត និងល្អប្រសើរនៅកម្ពុជា ដល់ប្រជាពលរដ្ឋ ភ្ញៀវទេសចរ និងធុរជនជប៉ុនផងដែរ។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី១៤ ខែមករា ឆ្នាំ២០២៥៕